FILIPINA, NAGLAHONG PARANG BULA SA CANADA

Si Christina ay isang mapagmahal na anak, masipag na volunteer, at pangarap niya maging isang guro sa Toronto, Canada. Pero isang araw, bigla na lang siyang naglaho na parang bula habang nagca-camping kasama ang kanyang tatlong kaibigan sa Rainbow Falls Provincial Park. Pati ang mga awtoridad sa Canada ay hindi maipaliwanag kung ano ba talaga ang nangyari sa kanya. Pag-usapan natin ngayon ang kaso ng isa nating kababayan na si Christina Calayca.

Ipinanganak si Christina noong December 10, 1986, at ang kanyang mga magulang ay sina Mario at Elizabeth. Noong 1980, mula Pilipinas ay lumipat ang kanyang ina sa Canada at dito nagkakilala ang kanyang mga magulang. Ang lugar na nilipatan ng kanyang ina sa Toronto ay tahanan ng maraming Filipino sa Canada. Pero hindi nagtagal, ang pagsasama ng kanyang mga magulang ay nagtapos. Isang taon pa lamang si Christina ay iniwan na sila ng kanyang ama, kaya mag-isa siyang pinalaki ng kanyang ina na si Elizabeth.

Makalipas ang apat na taon ay nagpakasal ulit ang kanyang ina at isinilang nito ang kanyang bunsong kapatid na pinangalanan na Michael. Determinado si Elizabeth na bigyan ng masaya at magandang buhay ang kanyang pamilya, kaya bata pa lamang si Christina ay sinanay na niya ito na laging magsimba. Kalaunan ay mabilis na nagkaroon ng mga kaibigan at naging isang deboto si Christina. Naging parte siya ng maraming programa sa kanilang simbahan at mahilig din siyang mag-volunteer kasama ang ibang mga kabataan.

Pangarap ni Christina na maging isang guro balang araw kaya nag-aral siyang mabuti. Nang makatapos siya ng high school, nag-enroll siya sa isang community college para mag-aral ng Early Childhood Education habang patuloy ang kanyang pag-vovolunteer sa kanilang simbahan. Habang itinataguyod ni Elizabeth ang kanyang sariling negosyo, nagtrabaho siya bilang isang cashier at caretaker para matulungan ang pagpasok ni Christina sa kanyang secondary school. Hindi nakaligtaan ni Christina ang sakripisyo ng kanyang ina, kaya katulad ng ibang mga anak, nangako ito na babayaran niya ang sakripisyo ng kanyang ina pagdating ng araw.

Noong 2006, ang pagod at sakripisyo ng mag-ina ay nagtapos nang maka-graduate at nakuha ni Christina ang kanyang Early Childhood Education certificate. Nakakuha agad siya ng trabaho sa isang daycare center sa St. Bernadette’s Family Resource Center. Kahit nakakapagod ang magturo at maggabay sa mga bata ay masaya siya sa kanyang ginagawa. Para makatulong sa mga gastusin sa kanilang bahay, hinahati ni Christina ang kanyang sahod at ibinibigay niya ito sa kanyang ina para pambayad ng kanilang renta.

Bukod sa kanyang trabaho sa daycare center, tumutulong din siyang mag-organize ng mga events sa kanilang simbahan at sa kanilang lugar. Siya ay parte ng Youth for Christ, na isang international Filipino organization na tumutulong sa mga kabataan. Isa siya sa mga tumutulong na mag-organize ng malalaki nilang conferences at mga events. Hindi din niya pinalampas ang pag-oorganize sa ika-50 kaarawan ng kanyang inang si Elizabeth. Pero ang lahat ng ito ay nagpa-overwhelm at naging sanhi ng pagod at stress sa kanya, kaya nagdesisyon si Christina na mag-relax.

Pero sa sandaling ito ay naganap ang isang misteryo. Noong July 28, 2007, ipinagdiwang nila ang ika-50 kaarawan ng kanyang ina na si Elizabeth kasama ang kanilang malalapit na kaibigan at mga kapamilya. Ang kanyang pagtatrabaho, pagtulong sa simbahan, pag-organize ng mga events, at ang huli ay ang birthday ng kanyang ina ang nagpa-overwhelm kay Christina. Kaya nang dumating ang August, sinabi niya sa kanyang mga kaibigan na sina Faith Castulo, Eddie Mejia, at JB Reyz na gusto niyang mag-relax.

Iminungkahi ni Christina sa kanyang mga kaibigan na pumunta sila sa Montreal sa susunod na weekend. Sa mga sumunod na araw ay naghanap ang magkakaibigan ng mga hotel na pwede nilang tuluyan, pero dahil sa may kamahalan ang mga hotel, isa sa kanila ang nagmungkahi na tumuloy na lang sa bahay ng isa nilang kaibigan sa Montreal. Pero dahil sa short notice na naibigay nila sa kaibigan, minabuti na lang nila na huwag nang ituloy. Sa halip na pumuntang Montreal, napagkasunduan ng magkakaibigan na pumunta na lang sa isang camping trip sa liblib na lugar sa Ontario.

Tulong-tulong silang naghanap ng mga park sa internet at pinili nila ang pangatlong park na lumabas sa kanilang internet search. Napagkasunduan nilang apat na ang kanilang pupuntahan sa weekend ay ang Rainbow Falls Provincial Park. Alas-tres ng madaling araw noong August 4, 2007, dumating ang tatlong kaibigan ni Christina na sina Eddie, JB, at Faith sa kanilang apartment para sunduin ito. Sa sumunod na 33 oras ay nagbiyahe sila papuntang Rainbow Falls Provincial Park.

Hapon ng August 5, nakarating ang magkakaibigan sa park pero napansin nila na malapit ang kanilang campsite sa main road, kaya nagpalipat sila sa campsite 88 para sa mas pribadong lugar. Sa loob ng dalawang oras ay nag-ayos ng gamit ang apat at nag-setup sila ng kanilang tent at isang fire pit. Hindi din nila nakalimutan na kuhanan ang isa’t isa ng mga larawan. Makikita sa kanilang larawan noong alas-tres ng hapon na kumakain si Christina kasama ang tatlo niyang kaibigan ng pasta na kanilang niluto sa campfire.

Alas-sais y media ng gabi naman ay nagdesisyon ang apat na umidlip muna dahil sa pagod sa kanilang biyahe, pero ang dapat na 30 minuto na pag-idlip ay naging apat na oras. Nagising ang apat ng alas-diyes y media ng gabi at kumain ulit sila ng natirang pasta at uminom sila ng konting alak. Bandang 11:59 ng gabi, isang litrato ang kinuhanan ng magkakaibigan at makikita dito na nakaupo sa harap ng fire pit sina Christina at Faith. Ang huling litrato ni Christina ay noong 12:03 ng madaling araw.

Umalis si Eddie dahil nag-shower ito sa CR ng campsite pero bumalik din ng 3:30, kung saan ayon dito ay si Christina na lang ang gising sa magkakaibigan. Ayon sa kanya, nag-joke si Christina na mag-swimming muna sila bago matulog. Makalipas ang ilang oras nilang pagtulog ay nagising ulit si Eddie at Christina, pero napansin nila na sina JB at Faith ay mahimbing pa rin ang tulog. Nagpasama si Christina kay Eddie sa CR at habang pabalik sila sa campsite ay tinanong ni Eddie si Christina kung gusto niyang mag-jogging, at pumayag naman ito.

Si Eddie, na nagte-training para maging isang bumbero, ay iminungkahi ang trail na makikita sa Trans-Canada Highway na malapit sa kanilang campsite pero tumanggi si Christina. Naghiwalay ang dalawa sa pagjo-jogging at pinili ni Eddie na mag-jogging malapit sa highway habang si Christina naman ay pinili ang trail sa loob ng park. Nang tinanong ni Christina si Eddie kung gaano sila katagal dapat tumakbo, nag-joke ito na tatakbo siya hanggang siya ay mamatay. Tinawanan lang siya ni Christina at nagtungo ito sa park trail patungong waterfalls nang hindi nagbibigay ng oras kung kailan sila dapat magkita ulit ni Eddie.

Nakita siya ni Eddie na tumakbo sa loob ng park at ito na ang huling beses na nakita niyang buhay ang kaibigan. Sa mga sumunod na oras ay nag-jogging at tumakbo si Eddie malapit sa highway patungo sa Rossport Campground sa kanlurang bahagi ng Rainbow Falls Provincial Park. Ayon sa kanya, tumigil siya sa isang picnic area kung saan inukit niya ang kanyang initial sa isang bato at pagkatapos ay bumalik na siya sa campsite 88 kung saan nakita niyang natutulog pa din sina JB at Faith pero hindi niya nakita si Christina.

Hindi siya agad nag-alala, bagkus ay umupo ito malapit sa campfire. Bandang 8:30 ng umaga, umikot siya sa kanilang campsite para maghanap ng isang palakol upang kanyang magamit sa pagputol ng kahoy para sa kanilang fire pit, pero ayon sa kanya ay wala siyang nakita. 30 minuto pa ang dumaan at bandang alas-nuwebe ng umaga, isang lalaki na nagngangalang Paul ay lumabas sa kanyang RV sa Rossport Campground na halos 5 kilometro ang layo sa Rainbow Falls Provincial Park Camp 88.

Ayon sa kanya, habang siya ay umiinom ng kanyang kape ay nakakita siya ng isang babae na mukhang Asian na naglalakad malapit sa Highway 17. Ayon sa kanyang salaysay, ang babae ay nakasuot ng itim na damit na parehas ng kulay ng damit ni Christina. Sumapit ang alas-nuwebe ng umaga, nagising na sina JB at Faith. Tinanong ng mga ito si Eddie kung nasaan si Christina, pero sinagot naman niya ang mga ito na sila ay nag-jogging nang magkahiwalay.

Katulad ni Eddie, hindi din nag-alala ang dalawa dahil ayon kay Faith, si Christina ay isang introvert at minsan gusto nitong mapag-isa. Idinagdag niya na minsan ay gusto nitong mapag-isa para magdasal o kaya naman gusto lang nito ng privacy. 30 minuto pa ang dumaan habang sila ay naghahanda ng kanilang umagahan, at dito na sinuyo ni Eddie si JB na i-check ang beach na malapit sa kanilang campsite para tingnan kung tumigil ba doon si Christina. Pero bumalik ito at sinabi na wala doon ang kanilang kaibigan.

Nang sumapit ang alas-onse ng umaga ay hindi pa rin bumabalik sa pagjo-jogging si Christina. Dito na sila nagsimulang mag-alala sa kalagayan nito kaya sina JB at Eddie ay nag-drive papunta sa lugar kung saan huling nakitang buhay ang kanilang kaibigan. Nang sinundan nila ang trail na pinuntahan ni Christina ay nakita nila na split trail pala ito, kaya kinailangan nilang maghiwalay. Si JB ay tumungo sa trail na papuntang Lake Superior habang si Eddie naman ay sinundan ang trail na pabalik ng Rainbow Falls.

Nang maabot ni Eddie ang dulo ng trail ay nakakita lang siya ng mabatong lugar at wala nang ibang trail na pwedeng sundan, kaya bumalik siya sa sasakyan at dito niya nakita sa loob si JB kung saan sinabi nito na wala din siyang nakita sa trail na kanyang pinuntahan. Bumalik ang dalawa sa kanilang campsite kung saan naghihintay si Faith. Nag-iwan sila ng isang note para kay Christina dahil nagbabakasali sila na bumalik ito sa kanilang campsite at makita nito na wala sila. Nakalagay sa note na pumunta sila sa Rossport at inilagay din nila na hinanap nila ito sa trail na kanyang pinuntahan pero hindi nila ito nakita.

Alas-dos ng hapon ay pumunta ang tatlong magkakaibigan sa gate ng Rainbow Falls Provincial Park para maghanap pa ng ibang posibleng trails na pwedeng puntahan ni Christina. Nang tinanong sila ng tao na nagtatrabaho sa park kung ano ang kanilang layunin sa pagtatanong, dito na nila sinabi na hinanap nila ang kanilang nawawalang kaibigan. Ayon sa trabahador, imposibleng nakarating si Christina sa Rossport Campground nang naglalakad dahil ito ay malayo ng 12 kilometro.

Inutusan sila ng trabahador na kontakin na lang nila ang Ontario Provincial Police o OPP. Sa loob ng 30 minuto, ang OPP Regional Emergency Response Team ay agad sinimulan ang kanilang search and rescue mission. Gumamit sila ng helicopter, isang float plane, at ibang mga aircraft na mayroong GPS, infrared cameras, at sonar detections dahil may napakalaking bahagi ng tubig sa park. Makalipas ang isang oras at kalahati, bandang alas-kwatro ng hapon, kinontak ng OPP si Elizabeth para ipaalam na nawawala ang kanyang anak.

Nang malaman niya ang nangyari sa kanyang anak ay agad siyang bumili ng ticket papuntang Rossport kasama ang ilan sa kanyang mga kamag-anak. Umaga ng Martes, August 7, 24 na oras matapos mawala ni Christina, ay dumating ang OPP kasama ang mga K9 unit sa park para maghanap ulit. Umasa sila na may ma-pick up na amoy ang mga ito, pero sa kasamaang palad ay walang pag-unlad ang kanilang paghahanap kay Christina. Ayon sa OPP, hindi sila nagulat dahil mas epektibo na maamoy ng mga aso ang amoy ni Christina sa unang 12 oras na nawala ito.

Hapon ng araw na din na iyon ay nakarating na sa wakas si Elizabeth sa Rainbow Falls National Park kasama ang iba niyang mga kamag-anak. Pero dahil ongoing ang search and rescue mission na ginagawa ng OPP ay hindi sila pinayagan na sumama sa paghahanap. Sa sumunod na tatlong araw ay hinalughog ng OPP ang buong kakahuyan ng Rainbow Park at isinama nila ang 53 km ng Casque Isles trails patungong Rainbow Falls property. Meron silang tatlong search and rescue team kung saan isa-isa nilang sinisilip ang bawat sulok at mga kakahuyan sa trail, pero sa kasamaang palad ay hindi nila nakita si Christina.

Sa pang-apat na araw na paghahanap ng OPP, bago sumikat ang araw ay gumamit sila ng isang aircraft na mayroong infrared cameras para umasa na meron silang mapi-pick up na heat signature ng tao, pero wala silang nakitang resulta. Pero makalipas ang ilang oras, nakakita sila ng mga ibon na umaaligid sa isang lugar, kaya nagpadala sila ng search and rescue team sa lugar. Ngunit wala silang nakitang bangkay o anumang patay na hayop.

Limang araw matapos mawala ni Christina, noong Sabado, August 11, 2007, mahigit isang daang residente ng mga lugar malapit sa Rainbow Falls ang tumulong sa pamilya ni Christina at mga imbestigador. Pero ni isa sa kanila ay walang nakitang ebidensya na magtuturo sa kinaroroonan ng dalaga. Dumaan ang mga araw at ilang linggo at walang nakukuhang resulta ang paghahanap kay Christina. At noong August 23, 2007, 17 araw matapos mawala ni Christina sa Rainbow Falls trail, opisyal na itinigil ng OPP ang kanilang paghahanap.

Ayon sa kanilang pahayag, sila ay tiwala sa resulta ng kanilang search and rescue mission na hindi nawala si Christina sa Rainbow Park o anumang campsite sa loob nito. Nang matigil ang paghahanap kay Christina ay nagsagawa ng imbestigasyon ang mga awtoridad sa labas ng park. Kinwestyon nila ang lahat ng kanyang mga kaibigan at lahat ng tao na naka-register na nasa park nang mawala si Christina. Dumaan sa isang interrogation ang kanyang tatlong kaibigan at tatlong beses na na-interview. Pagkatapos ng interrogation sa tatlo ay tinanggal ang kanilang mga pangalan sa mga persons of interest.

Simula nang naglahong parang bula si Christina noong August 6, 2007, sa Rainbow Falls Provincial Park ay wala ka halos makikita na mga ebidensya sa internet. Ang kanyang kaso ay hindi din gaanong na-cover ng media o press na lalong nagpahirap sa kalooban ng mga tao na kanyang naiwan, lalong-lalo na sa kanyang ina na si Elizabeth. Magpahanggang ngayon, si Elizabeth, ang kanyang mga kamag-anak, at iba nilang mga kaibigan ay nagsasagawa pa rin ng paghahanap sa Rainbow Falls Park.

Umaasa sila na makahanap ng ebidensya na magtuturo sa kinaroroonan ni Christina. Pwede lang tayong manghula na dahil sa walang ginawang press conference o opisyal na update na ginawa ang OPP ay wala din silang nakita na ebidensya sa kanilang search and rescue mission. Pero isang maliit na detalye ang nadiskubre ng isang grupo ng rescue team ilang araw matapos mawala ni Christina. Habang sila ay naghahanap sa isang beach malapit sa Rainbow Falls, nakakita sila ng isang pares ng medyas.

Ang medyas ay malapit sa isang malalim na butas. Ang butas ay may lalim na 35 feet. Bukod sa medyas ay nakakita din sila ng bakas ng paa malapit dito. Ayon sa mga imbestigador mula sa OPP, tiningnan nila ang detalyeng ito pero hindi ito nakatulong dahil ang mga medyas ay masyadong malaki para kay Christina, kaya naisip nila na baka ang medyas ay naiwan lamang ng isang tao. Pero ang hindi malinaw ay kung nagsagawa ba sila ng DNA test sa medyas o kung ang bakas ng paa na nakita ay pareho sa sukat ng paa ni Christina.

Uulitin ko, dahil sa tikom ang bibig ng OPP at wala silang detalye na sinabi sa resulta ng kanilang imbestigasyon, pwede lang natin na ipagpalagay na tiningnan nila ito pero wala silang nakita para makatulong sa kaso. Dahil sa mapapaisip ka talaga kung paano naglaho na lamang parang bula si Christina ay napakaraming mga teorya ang hindi maiwasan na lumutang kaugnay sa kanyang pagkawala. Ang mga unang teorya na lumutang ay baka na-kidnap si Christina. Ayon sa iba, ang medyas ay baka sa tao na kumuha kay Christina.

Ang pinakasikat na teorya ay naligaw si Christina sa kanyang pagjo-jogging at hindi na nito nakita ang daan pabalik. Si Christina ay hindi sanay na mag-camping. Para sa mga hindi taga-Ontario o walang karanasan na mag-hiking sa isang napakalaking lugar tulad ng Rainbow Falls Park, mabilis maligaw sa kakahuyan at mahirap makabalik sa trail na iyong nilalakaran dahil napapaligiran ka ng halos walang katapusan na mga kakahuyan. May karanasan si Christina sa pagka-lost sa liblib na lugar sa Ontario. Sa totoo nga, isang buwan bago ang camping nilang magkakaibigan ay nasa isang camping trip si Christina kasama ang kanyang mga kaibigan na sina Faith, Eddie, at JB.

Naligaw silang lahat sa isang kakahuyan at agad itong ikinabahala ni Christina. Ayon kay Faith, nagdasal ito ng taimtim at kalaunan ay nakita din nila ang daan pabalik. Sa nangyari ay makikita o mapapansin mo na hindi komportable si Christina. Pero ang teoryang ito ang pinagtatalunan ng mga tao: na kung hindi siya komportable sa liblib na lugar at kakahuyan, bakit niya hindi ginamit ang mismong trail sa pagjo-jogging o kaya naman sa paglalakad kung alam niya na mabilis siyang maliligaw?

Nang makausap ng mga imbestigador ang tiyuhin ni Christina, ibinahagi nito na marami itong kinatatakutan tulad ng mga mababangis na hayop, mga gagamba, at mga insekto. Kaya kung iisipin mo, bakit ang hindi sanay na mag-camping at matatakutin sa mga insektong si Christina ay pipiliin na gumala-gala hanggang maligaw na siya sa liblib na lugar kung alam niyang may mga insekto, gagamba, at ang malala na mangyari ay mawala siya sa napakalaking park?

Ang pangatlong teorya ay galing mismo sa OPP. Ayon sa kanila, hindi sa park nawala si Christina. Hindi lang ang personality ni Christina ang naging dahilan ng OPP para itigil na ang paghahanap, pati na rin ang katotohanan na wala halos makitang ebidensya. Ayon din sa statistics, halos 95% ng mga nawawala sa park ay agad nakikita sa loob ng 8 kilometro. Kumbinsido ang OPP na wala sa park si Christina dahil ayon sa statistics ng Rainbow Park sa history nito, isang beses lang may nawalang tao dito.

Ang taong nawala ay isang 75-taong gulang na matanda na nakita din matapos ang siyam na oras. Para sa kanila, ang Rainbow National Park ay isang family-friendly na lugar kung saan pwedeng mag-camping at mag-celebrate ng iba’t ibang events at ito ay napapaligiran ng iba’t ibang enclosed property, kaya naniniwala ang OPP na wala dito si Christina. Ang pang-apat na teorya ay inatake si Christina ng mabangis na hayop. Ang ibang tao ay nagsabi na naligaw si Christina at inatake ito ng mabangis na hayop.

May mga black bear, mga lobo, at ibang mga mababangis na hayop ang naninirahan sa Rainbow Park. Pero nang tinanong ng mga imbestigador ang mga eksperto sa black bear sa loob at labas ng park ay isinantabi nila agad ang teorya na ito. Para sa mga eksperto, kahit may siyam na daan na black bear sa North America ay meron lamang naitala na dalawang tao na namatay sa pagitan ng 2000 hanggang 2007. Idinagdag din nila na kung nakasalubong o inatake man si Christina ng black bear sa kanyang paglalakad ay kakaladkarin lang ito ng bear hanggang 600 feet.

Ayon sa mga eksperto, kung inatake si Christina ay dapat mayroong mga marka na indikasyon na hinila si Christina, pero walang nakita ang OPP sa kanilang paghahanap. Wala din silang nakitang mga dugo o sign ng struggle. Sa teorya naman na inatake si Christina ng mga lobo ay agad itong isinantabi ng mga imbestigador base sa statistics. Meron lang isang record sa buong North America ng pag-atake ng lobo na naitala noong 2007.

Ang panglimang teorya ng mga tao ay nagsasabi na may kinalaman ang mga kaibigan ni Christina, lalo na si Eddie. Kahit na clear na ang pangalan nina Faith, JB, at Eddie ay maraming tao pa din ang hindi mapigilan na magduda sa mga ito, lalo na kay Eddie dahil sa kwestyonable nitong kilos noong umaga ng August 6, 2007. Ang mga taong duda sa kanya ay kinukwestyon ang kanyang desisyon na biglaan na lang nitong niyayang mag-jogging si Christina. Lumutang sa interview sa nanay ni Christina na mayroong injury sa paa ang kanyang anak ilang linggo bago ito mag-camping.

Ayon kay Elizabeth, aksidenteng nakatapak ng karayom at namaga ang paa ni Christina kaya nakakaranas ito ng sakit kapag siya ay naglalakad ng mahabang oras. Kaya isang palaisipan sa kanya kung bakit ito pumayag sa idea ni Eddie na mag-jogging sila nung umaga na iyon. Pero isinantabi ang teoryang ito ng mga imbestigador dahil para sa kanila, si Eddie ay isang mabuting mamamayan ng Canada. Wala itong record at para sa kanila, hindi nito sasayangin ang maganda nitong future o hinaharap.

Siya ay nagte-training para maging isang bumbero at nang nangyari ang pagkawala ni Christina, siya ay isang volunteer sa isang fire station. Ayon sa mga imbestigador, wala silang maisip na motibo ni Eddie para saktan nito si Christina. Parehong youth leader sina Eddie at Christina sa kanilang simbahan at wala ding nabanggit na alitan ang dalawa ayon sa kanilang mga kaibigan na sina Faith at JB. Ito din ang parehong salaysay ng mga taong malalapit sa kanila.

Ang pang-anim na teorya na iniisip ng mga tao ay lumayas nang kusa si Christina at umalis siya sa park nang walang pasabi. Nag-jogging ito at pumunta sa highway, at sa palagay ng mga imbestigador ay sumakay ito sa sasakyan ng isang delikadong tao na nag-alok sa kanya at dito na siya napahamak. Matindi ang naging epekto ng paghahanap kay Christina sa kalusugan ni Elizabeth. Nagkaroon siya ng problema sa kanyang binti at katawan at tumaas din ang kanyang cholesterol dahil sa walang sawang paghahanap kay Christina. Nang namatay ang kapatid niya sa Pilipinas ay hindi din siya nakauwi para dumalo sa libing nito. Magpahanggang ngayon ay hindi pa rin nakikita si Christina.